CIRCULUS LATINUS LONDINIENSIS

Latiné | English

Circulus Latinus Londiniensis omne genus homines Londinii vel in viciniá degentes congregat qui Latiné loqui student, linguá non sólum nostrorum egregiorum majorum Romanorum, sed etiam maximé peculiari Britannici cultús per sæcula, linguá multorum notissimorum Britannorum, ab Alcuino Eboracensi vel Duns Scoto usque ad Thomam Morum, Franciscum Baconum vel Isaacum Newtonum.

Circulus Latinus Londiniensis conditus est paulo post quam æstate anni 1998 unus nostrum Reginaldi Foster Æstivá Romæ Latinitate et Societatis Latinæ Saravipontanæ Seminario Matritensi adfuit. Vivæ amore Latinitatis accensus decrevit alios linguæ Latinæ fautores convocare quicum statutis temporis intervallis Latiné colloqui posset etiam Londinii. Multos per annos CL Londiniensem frequentaverunt tantum Avitus, philologus classicus, et Simon ac Hieremias, duo polymathes juris periti, nonnumquam visitans etiam Jonathan, universitarius professor cathedraticus. Paulatim vero CL Londiniensis crescere cœpit. Gavisus est primum nová præsentiá Cordi, historici, atque Asturis, ingeniari, necnon postea etiam Jacobi, philologi classici. Anno vero 2008 quidam ludi magistri qui in seminario Latino trans Atlanticum eá æstate celebrato se cognoverant cœperunt etiam suo Marte convenire ut Latiné colloquerentur, quicum amicitiæ vinculis communicatis, etiam Evan atque Anna, ludi magistri, ditant nunc Latinitatem vivam Londiniensem. Novem ergo regulares sodales hactenus sumus, etiam si alii plures nos visitant aliquando.

Circulus Latinus Londiniensis bis in mense convenit, nempe secundo cujusque mensis Solis die, quas sessiones regit Evan, et quarto cujusque mensis Jovis die, quas sessiones moderatur quicumque sodalis cuj per rotam alphabeticam contigit.

Sicut plurimi alii Circuli Latini qui per totum orbem terrarum congregantur, malumus et nos convenire in locum qui foveat convivalem aditum ad humanitatem cujus omnes possint participare, nempe in domum publicam —sic enim appellant Angli tabernas— magnáque jucunditate omnibus de rebus Latiné loqui solemus quas animum nostrum alliciunt dum cervesiæ sextarios —ut fit apud Britannos— bibimus vel cenamus. Sæpe etiam cum prope assidentibus sermones conserimus qui mirantur quanam linguá tam alacriter loquamur.

Potes, candide lector, nostri Circuli Latini discere acta, necnon inspicere universitarium nostrum præconium.

Si alios convenire vis qui Londinii Latiné loquantur, ad nos scribe! Si vero tibi est adhuc discenda lingua nostra majorumque nostrorum, inspice Scholam Latinam Universalem sive Floodlight.

Proximum conveniemus

Sólis die 10 Maji 2009
horá 2:00pm
in deversori cauponá
'Chamberlain Hotel'
(Minories)

Jovis die 21 Maji 2009
horá 6:00pm
in domo publicá
'The Marlborough Arms'
(Torrington Place)

Circulus Latinus Londiniensis
membrum est


Societatis Circulorum Latinorum